政情：獄中度65歲 李卓人生日愈過愈衰

話說前職工盟總幹事蒙兆達，喺工會解散前已離港去咗英國。佢尋日就喺社交平台貼文，憶起過往同李卓人慶祝生日嘅境況。佢話上次喺李卓人「登陸」時，嗰晚啱啱係職工盟執委會開會，開完會已經好夜，佢哋就送上預備好嘅蛋糕，一齊唱生日歌，而嗰年李卓人之前喺選舉落敗，冇咗立法會議席，唔再係議員身份。

事隔5年，身邊嘅人同事都變化好大。佢話冇人料到職工盟會解散，而李卓人就要喺獄中過65歲生日。

李卓人因前年8‧18、8‧31、10‧1同舊年6‧4集會案，被控組織及參與未經批准集結等罪，被判囚20個月。蒙憶述舊年離港前去探監，引述李都話好難估計要坐幾耐先出獄，而喺獄中每日定時作息，每日完成被指派工作，可以規律咁生活，就當係修行同鍛煉喎。