政情：業主倒楣 曾振興整爛屋無錢賠

仲記得曾振興喺舊年去咗英國一個月後，喺社交平台貼文話當時帶住3萬幾蚊港元現金同大女先行離港，再喺當地等待太太同兩個年幼子女，又透露財政壓力重大，仲未儲夠簽證所需費用，又未有穩定收入，希望可以半年內站穩腳跟。

但係近日喺社交平台傳出一啲相同對話嘅截圖，當中有網民話自己有居英嘅朋友免費畀間屋曾振興一家5口住，點知曾一家入住後屋內物品不斷被破壞。據嗰位網民所講，曾唔睇住自己啲細路仔，日日匿埋喺間房打機，任由啲細路仔破壞間屋。從網民提供嘅照片所見，小朋友玩到隻狗仔身上都有意粉、床側劃花晒、地氈有熨斗印、花園木門斷咗等等。唔單止上述嘅毀壞，網民更批評曾整爛抽油煙機後，只係用封箱膠紙黐住就算，無向業主報告，形容係每個星期都發現有新整爛嘅嘢。

咁多嘢被破壞，維修費用超過1,000英鎊（約一萬港元），業主當然希望拎得番賠償，照片所見，曾振興亦喺上年12月15日立據，承諾願意賠償一切居住期間所造成嘅損毀，而持據人有權就相關金額作出追討。之不過，網民又公開同曾嘅對話截圖，當中可見曾聲稱自己戶口得番300英鎊（約3,100港元），賠償唔到，反問「可以點畀錢」。

當業主問及曾申請簽證如何證明財力時，曾回應指自己有穩定工作同埋居所，但就反問對方「你意思好似係想同HO（Home Office）舉報我無留喺英國嘅能力？」業主就回應指曾「諗太多」，仲話曾作為一家之主，做錯嘢就要負擔番責任。業主指，就算係一間公司出現問題，都唔會隨便申請破產，所以叫曾作為男人，唔該佢問人借又好點都好，都要喺限期前找番條數囉！

網友之後再補充，雖然曾最後搬離該住所，但係有指曾無送到女兒返學，亦都無請假，搞到學校當係失蹤兒童個案聯絡業主。網民指，業主都唔係咩有錢人，叫業主負擔1,000英鎊（約一萬港元）嘅維修費並唔公平，又形容業主對此非常苦惱，情緒都受到影響，都係希望可以搵到個解決辦法咁話喎。而曾近日雖然都有更新社交平台，但只係分享同疫情有關嘅新聞，未有提及今次嘅住屋事件喎。