昔日東方政情：抗疫為先 立會13新丁想打尖
辯論致謝動議應放一邊
本港疫情嚴峻，確診數字屢創新高。多名新任立法會議員尋日聯署提交緊急動議，要求於下周三（16日）大會「插隊」討論抗疫工作。惟當日原定一連3日召開遙距會議處理《施政報告》致謝議案，究竟最終會係如何安排？
13名新任議員聯署信中提到，希望立法會內務委員會主席向立法會主席尋求免卻動議議案嘅12天預告期，於下周三嘅立法會大會緊急加插「處理第五波新型冠狀病毒疫情的緊急方案」 嘅議案，討論抗疫工作。
喺尋日舉行嘅內會上，內會主席拒絕處理有關動議，指討論施政報告係《基本法》下嘅議會職能，而上次內會議員都同意及決定議程，並已經告知政府。
另按照規定，議員若要尋求內會嘅同意，須於內會議程規定嘅限期前提出，即本周二（8日）下午之前，由於期限已過，故唔會處理有關要求。又強調各議員可以自行向立法會主席尋求豁免12天預告期，並動議議案。
傳撥時間供發表個人意見
另外，議員可考慮利用施政報告辯論嘅發言時間，或者立法會衞生事務委員會，以及即將舉行嘅特別財務委員會會議上，都可以發表有關抗疫意見。又稱倘若議員同意舉行特別內會亦可以安排。
聯署人之一嘅議員江玉歡就提到，佢哋並非製造難題，但認為非常時期，市民關注防疫，議員與其發出聲明，不如在會議上集中討論。
會後，另一位有份參與聯署嘅議員林筱魯，話要視乎特區政府呢幾日同內地商討嘅結果，睇番事情嘅發展先至決定下周三大會是否提出緊急質詢。佢又話最緊要係達到跨部門會議嘅目的，如果疫情惡化又見唔到政府有清晰回應，都會繼續跟進。
至於會否縮短致謝議案辯論時間，以騰出時間討論抗疫；還是延長會議時間，喺唔影響致謝動議嘅情況下討論疫情？據了解，議員都係傾向按原定計劃進行致謝議案辯論，不過就會善用當中「走出疫境」環節，發表個人對抗疫嘅意見。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
