政情：疫情大爆發立會遙距議事延長至2‧18

因新冠肺炎疫情大爆發，立法會喺本月3日宣布將所有委員會皆以Zoom視像會議形式遙距進行。初時預計措施實行至今日，但因為政府尋日宣布，將政府僱員特別上班安排延長至2月18日，立法會亦緊隨其後，所有會議繼續以遙距方式舉行，直至政府嘅特別上班安排結束為止。

根據立法會文件，立法會行政管理委員會已同意秘書處繼續安排職員在家工作至2月18日。之不過，負責為立法會會議或委員會會議提供服務，以及維持秘書處基本運作嘅職員同值勤人員則除外。另外，立法會餐廳已改以D類食肆模式營運，所有堂食顧客必須使用「安心出行」，同埋接種至少一劑新冠疫苗。

立法會上月已通過決議，2019冠狀病毒疫情若達到某個程度，容許立法會大會、內務委員會及財務委員會透過遙距方式開會。雖則呢幾日都有委員會會議以Zoom視像會議形式遙距進行，但下周三大會首次以視像舉行，屆時將多達百人參與，唔知又會出現點樣嘅情況呢？