政情：歷史博物館搞錯虎標本 眼利市民提醒始撤換

香港歷史博物館內設有介紹香港自然生態嘅展區，丁新豹話內裏劃出部分地方仿造一個香港未有人類活動之前嘅自然環境，當中所布置嘅動植物模型或標本，都經仔細考證並非外來物種，就連播出嘅雀仔叫聲，都係來自本地禽鳥。當佢講到陸上動物嘅時候，就強調香港過去真係有老虎㗎，而新界嘅虎蹤更見諸於歷史添！所以博物館方面收藏咗一隻老虎標本，以前喺九龍公園舊館都展出過，但後來有眼利嘅市民指出，該標本係孟加拉虎。

佢話由於香港距離孟加拉實在太遠，中間相隔廣西、越南、泰國，無論點講都唔可能喺香港出現，於是館方將孟加拉虎標本撤出，其後做番一隻華南虎，免得「穿崩」咁話。其後佢又語帶感觸咁話，香港嘅蝴蝶同飛蛾品種本來係非常之多，而目前存放於自然生態學習區內嘅蝴蝶同貝殼標本，因環境污染嘅關係，其活體依家好多都搵唔番啦！