政情：疫情爆錶 鄉議局團拜再取消

往年鄉議局喺新年期間，仲會喺沙田馬場舉行鄉議局盃。之不過，馬會喺上月17日都已經發出通告，話因應疫情嘅最新狀況，包括鄉議局盃等5個賽事都已全數取消。

唔單止由2020年開始，鄉議局因疫情而要取消新春團拜，而喺2019年10月及11月，反對修訂《逃犯條例》示威期間，鄉議局亦都兩度受到示威者破壞，示威者用長竹及鐵枝等硬物，擊碎新界鄉議局大樓嘅玻璃大門，之後約有數十人進入大樓內繼續破壞，大樓內多幅玻璃門及玻璃窗被打碎，正門嘅電視、對聯及閉路電視被打爛及拆毀。