昔日東方政情：議會爭取主動 李梓敬搵人教撳鐘
立法會會期開始，唔少未摸熟規矩嘅議會「新丁」向前輩請教。曾經擔任區議員嘅李梓敬成功進入議會，但連撳鐘都要請教人哋喎。佢話4年議員任期內希望推動假新聞法、醫護人員宣誓同埋改革公務員系統。
本身係KOL嘅李梓敬，經常喺各大社交平台發言，依家進入議會，會唔會時間唔夠用呢？佢就話休息時間老早就掟咗出窗外，網上節目都做唔到每日一篇，認為落區親身接觸市民好重要，同時就立法會程序多次請教前輩，避免出現「甩轆」。
喺議事堂裏面，議員爭取發言往往需要鬥快撳鐘，作為「新丁」嘅李梓敬都有請教議員容海恩，事關容嘅黨友都讚佢撳得快，唔知係咪容打慣遊戲機嘅緣故呢？
話要掃走公僕陋習
至於嚟緊4年嘅議員任期，李就話公務員系統要掃走「少做少錯」嘅文化，升遷唔可以論資排輩；亦會搵機會推動醫護人員宣誓，同埋爭取訂立假新聞法。之但係，都要視乎議員議案抽到乜嘢時間，先決定做邊樣先啦。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
