政情：議會爭取主動 李梓敬搵人教撳鐘

本身係KOL嘅李梓敬，經常喺各大社交平台發言，依家進入議會，會唔會時間唔夠用呢？佢就話休息時間老早就掟咗出窗外，網上節目都做唔到每日一篇，認為落區親身接觸市民好重要，同時就立法會程序多次請教前輩，避免出現「甩轆」。

喺議事堂裏面，議員爭取發言往往需要鬥快撳鐘，作為「新丁」嘅李梓敬都有請教議員容海恩，事關容嘅黨友都讚佢撳得快，唔知係咪容打慣遊戲機嘅緣故呢？

至於嚟緊4年嘅議員任期，李就話公務員系統要掃走「少做少錯」嘅文化，升遷唔可以論資排輩；亦會搵機會推動醫護人員宣誓，同埋爭取訂立假新聞法。之但係，都要視乎議員議案抽到乜嘢時間，先決定做邊樣先啦。