政情：傳髮型屋勒令落閘 黃傑龍「試」長髮

話說坊間流傳消息，指政府打算收緊防疫措施，擬將髮型屋納入停運處所名單。於是黃傑龍話做人應該要未雨綢繆，假設兩個月冇得去剪頭髮，咁就要規劃吓，有乜嘢髮型適合自己，仲話冇理由「下下全香港木村拓哉」添！至於網民嘅留言亦不乏「高見」，譬如建議「剪光佢唔使煩」又或者「兩個月你真係有咁多頭髮先至再諗」。

其實黃傑龍喺中學時代，都試過留長髮，但自從升讀大學之後就改為容易打理嘅清爽短髮，維持至今日已經廿幾年喇。既然擔心政府勒令髮型屋停業，點解依家唔盡快去處理頭上嘅煩惱絲呢？佢話作用唔大，事關過年前佢先至幫襯過髮型屋。佢又話第5波疫情來勢洶洶，而自己作為市民，只能盡量配合政府嘅防疫措施。