政情：移民感困擾 馬仲儀：似拋棄同僚

馬仲儀話移民前有掙扎，一來佢喺香港有公職在身，二來佢喺公立醫院有好多病人都跟進咗好多年，已經同佢哋嘅屋企人建立深厚感情，離開就好似拋棄同路人。不過，佢又話唔會擔心身在香港嘅病人，畢竟香港嘅醫護都好優秀。

另外，佢話自己嘅政治理念喺某啲事件上同政府不一，但佢冇犯法，唔覺得自己有被捕風險，但感覺到喺香港生活可能會未能達到佢對於社會嘅期望，對醫學前途、工作上都抱有疑問咁話喇。

去年底，馬仲儀離開香港，當時有指或因醫護可能要宣誓、社會氣氛及政府修改《醫生註冊條例》等有關。佢當時回覆傳媒查詢，話香港氣壓太低，睇唔到自己希望見到嘅風景，但強調佢一直都安全嘅。