政情：新冠作惡公僕焗在家工作區會開會冇着落

新冠肺炎Omicron變種病毒喺社區擴散，唔單止立法會嘅日常運作受到影響，就連區議會都冇得開會喎。北區區議會原定喺本周二（8日）召開大會，但前日就收到政府通知，話因為公務員在家工作，冇辦法派員出席會議，連會議場地都唔可以使用喇。

睇番北區區議會當日嘅議程，本應討論喺東鐵線增設古洞站，以及喺古洞站設立農業園第二期嘅發展計劃等議題，仲有議員提出嘅「完善北部都會區本地旅遊基建、法規、推廣及管理」提案等，依家統統都要改期進行喇。

沈豪傑想改用線上會議

北區區議會主席羅庭德話，北區區議會秘書處收到民政事務總署通知，直到公務員在家工作安排結束、即係本月11日之前，都冇辦法召開會議，全港18區區議會嘅情況都一樣呀。佢就話公務員在家工作嘅模式，難免出現搵唔到官員嘅情況，話「古洞站同疫情都好重要」，並唔可以忽略香港嘅基建咁話啦。

其實喺2月召開大會嘅仲有離島區同埋元朗區議會。其中元朗區議會主席沈豪傑話，因疫情緣故，上個月嘅委員會會議已全數延期，會視乎疫情走勢決定本月22日會否召開大會。但若果疫情持續，咁咪一直冇得開會？佢話都會同區議會秘書處商討，可否以線上形式進行會議，技術上冇話做唔到嘅，如果同政府部門僅用書面形式溝通，成效始終比唔上當面質詢喇。

事實上，過去都曾出現相似嘅情況。因為疫情影響，去年民政總署曾要求區議會暫停或者推遲會議，當時就有區議會主席如期召開大會。之不過，區議員當時意見都出現分歧，直到最後就因為法定人數不足而流會喇。唔知今次區議員又會唔會聽政府支笛呢？