政情：立會遙距會議 唔係清一色?

因應第5波疫情肆虐，立法會所有會議尋日起至本月11日，改以遙距形式舉行，而尋日舉行嘅人力事務委員會特別會議就係今屆首場視像會議。按立法會最新指引，所有參與遙距會議嘅議員不但要留喺適當安靜嘅固定位置，且遙距會議進行期間，議員須使用會議程式嘅「虛擬背景」功能，以顯示有顏色嘅背景，其中選委界議員須採用橙色，功能界別議員使用綠色，而直選議員則選用紫色。

另外，可能吸取上屆立法會嘅經驗，尋日遙距舉行嘅會議甚少失誤場面，各議員嘅畫面都相當穩定，就連之前邊開會邊駕駛嘅議員郭偉强，今次都坐定定開會，佢其後都喺Facebook上載開會相，顯示自己喺議員辦公室內參與會議。而會議期間只係有出席官員嘅收音有雜聲，惹來議員投訴話聽得好辛苦。