政情：靜雞雞由台赴英 李軒朗自爆染疫

李軒朗日前喺社交平台貼文，講到港人受到疫情困擾，但其實佢都喺舊年12月中招。跟住就大肆評論香港同英國嘅抗疫措施，先至自爆目前身處英國，亦喺倫敦中招。

舊年話到台灣高雄國立中山大學讀書嘅李軒朗話，佢同親人摯友多番傾談、慎重考慮到台灣同英國兩地情況後，決定旅居英國，而且較早前已抵達倫敦。佢話依家生活尚算安好，已經物色到未來居所，但就仍未搵到全職工作，而呢排都一直有面試機會，現時做自僱人士嘅收入，勉強可應付日常開支，仲話將來冀參與更多有助連結海外港人嘅工作同其他公益企劃。

李軒朗喺舊年5月宣布離港，時隔4個月就喺社交平台透露已抵達台灣，告別「過去數月的離散生活」，將以碩士生身份入讀國立中山大學政治學研究所。佢前年曾經同時任元朗區議員王百羽合組名單參加民主派35+初選，同報名參選立法會「超區」議席，其後二人涉向選舉事務處提交虛假文書，詐取選舉資助被捕。