政情：抗疫應變 政府慢得離譜

梁批評政府抗議欠缺前瞻性，話亞博館嘅社區治療設施，喺上年年中疫情緩和時縮減規模，以致近期本港第5波疫情爆發時，要一段時間先能夠重新完全投入運作，反映政府思維唔夠周詳同埋長遠。佢再次督促政府嘅抗疫防疫政策要有短、中、長期嘅考慮，而唔係見步行步。佢又話當佢尋日去視察時，先至見到8至11號館嘅社區治療設施重開咋。

由於變種病毒Omicron傳播力驚人，佢話喺過去兩年大家都可以見到，每次病毒變種後，傳播力都會變得更強。因此，佢希望政府喺短期政策方面可以借鏡上海嘅「2、4、24」流行病學調查嘅成功經驗，即係於發現確診個案嘅頭兩小時內，調動工作人員到達現場，將確診者送到隔離中心；4小時內完成核心嘅調查並完成檢測，搵出所有密切接觸者送去隔離中心；而24小時內就已經要查清楚所有密切接觸者嘅接觸者，提升政府整體嘅抗疫效率，唔需要大規模封區，都可以將擾民嘅程度減至最低。

至於中期政策方面，佢認為政府要物色更多地方興建二線隔離治療病床，紓緩醫療壓力。長期政策上就要積極跟進番2003年沙士調查報告中，提出興建一所有足夠負壓病床嘅傳染病醫院作為長遠之用。

對於近期社會上有聲音質疑，政府動態清零嘅政策係咪有效，更開始有人提出應該好似外地咁改為採取與病毒共存策略，梁美芬就希望政府千祈唔好放棄清零嘅目標，應該盡快同內地商討，成立同內地直接對口嘅「內地香港共同抗疫協調委員會」，一定要盡最大嘅努力，同埋以盡快通關作為落實政策嘅考慮，先至可以令本港經濟盡快走出目前困境。