政情：全球前2%頂尖科學家 許樹昌鍾南山打入前8

許樹昌係傳染病學權威，2003年沙士疫情期間，許就參與沙士病人嘅治療、研究同復康等工作。前年新冠肺炎疫情爆發初期，許更斷言新冠肺炎病毒嘅傳播力較過去嘅沙士或中東呼吸綜合症都要強，而早前許就因為支持漁護署大規模撲殺倉鼠，收到「希望你早日過身，等收報應」嘅電郵恐嚇。

至於鍾南山亦因參與對抗2003年沙士疫情而聲名鵲起，前年年初當世衞組織聲稱新冠肺炎病毒「沒有證據人傳人」，並呼籲不應對國際貿易或旅行實施任何限制嘅時候，鍾卻持相反見解，指病毒「肯定的人傳人」。

除許樹昌及鍾南山，中國醫學科學院北京協和醫學院院校長王辰及國家呼吸醫學中心嘅關偉杰亦進入全球前50名。而名單係根據一個學術文章嘅數據庫，按總引用量、文章數目等評分。