政情：傳民主黨甘乃威秘密離港

低調賣樓套現獨留病母過年

近年陸續有民主派人士變賣物業，當中有部分人更因涉嫌違反《港區國安法》而被還押。有消息指，中西區前區議員、民主黨黨員甘乃威，早前已離開香港，近日更以低於巿價沽售佢位於西半山嘅物業套現，並遺下患病嘅年邁母親。由於佢行蹤飄忽，暫時未知佢嘅落腳地點。

甘乃威舊年7月辭去連續服務咗7屆嘅中西區區議會職務，當時佢表示自己經過兩次手術，身體要停落嚟休息，加上香港嘅民主路不通，令佢萌生去意，自此就喺政壇銷聲匿迹。

之不過，有消息傳出甘乃威已秘密離港，並喺辭去區議會職務後，就委託地產公司以作價2,088萬元，放售西半山列堤頓道嘅高層住宅連車位。據了解，單位由甘氏夫婦喺2009年購入，但兩人都無現身賣樓，一概由親友代辦，而放售資料並無見諸於地產代理嘅舖面或賣樓廣告，更遑論相關物業嘅圖片，總之過程相當保密，估計係想低調套現。

大幅劈價仍1800萬成交

據悉，該單位樓齡26年，實用面積781平方呎，屬區內優質單位，結果喺今個月10號連車位賣出，並大幅劈價，以1,800萬元成交。至於甘氏夫婦嘅去向依然成謎，不過甘乃威嘅九旬病母就暫時獨自留港，未知有咩打算。

其實甘乃威一直係政壇惹火人物，佢喺2009年被指求愛不遂而解僱女助理，其後更因行為不檢險被立法會提出譴責動議。而佢前年喺中西區區議會開會期間，甚至大鬧民政事務專員「人都不如」，被批評發表侮辱言論。

泛民密密放盤攞錢最緊要

其實民主派人士賣樓都唔係新鮮事，而佢哋突然套現大量現金，外界猜測不外乎係為咗離港或籌錢打官司。其中曾被警方國安處以協助罪犯罪名拘捕嘅九龍城區議員黃國桐，舊年就沽出太古城恒星閣單位。另外，前議員區諾軒亦被揭以710萬元，沽出將軍澳裕明苑一單位，當時佢就否認「着草」嘅指控。

另外，民主黨前副主席林卓廷亦以超過千萬元賣出沙田翠湖花園嘅物業，而前支聯會主席李卓人亦以1,000萬元賤賣其位於美孚新邨嘅單位套現。