政情：壹傳媒之亂算帳審查員任期延長

政府表示，根據《公司條例》（第622章）第841（2）及（3）條賦予嘅權力，財政司司長喺去年7月28日委任陳錦榮為審查員調查壹傳媒嘅事務，目標喺6個月內向財政司司長提交最終報告。審查員喺去年9月14日向財政司司長提交中期報告，揭示嘅事項包括壹傳媒一直以不公平地損害成員權益嘅方式經營事務。審查員亦指出壹傳媒已無力償還債項。基於上述情況，財政司司長經考慮公眾利益後，喺去年9月29日向法院提交將壹傳媒清盤嘅呈請。法院其後委任臨時清盤人，並喺去年12月15日對壹傳媒頒布清盤令。

之不過到咗半年限期之際，審查員最近同財政司司長匯報指尚未全面取得同審視與調查有關嘅資料，以作出詳細嘅最終報告。考慮到徹底嘅調查對作出最終報告至為重要，財政司司長就決定將審查員嘅任期延長3個月，直至今年4月27日，屆時審查員亦會提交最終報告。

而壹傳媒亦公布，灝天（香港）會計師事務所於今年1月13日起辭任公司核數師，原因係該會計師行無法完成公司嘅審計工作。根據灝天嘅函件解釋，於辭任函日期，灝天尚未收到壹傳媒管理層提供嘅任何與審計未決事項有關之任何資料文件，所以無法準確估計其將進一步產生嘅成本同內部資源等，故此先辭去壹傳媒核數師職務。

其實政府早前都講過，壹傳媒涉及違法行為同多項欺詐不當行為，有幾項情況值得關注，包括早前公布公司流動資金充裕，足夠18個月運作，但保安局凍結1,800萬元不到一個星期內，又宣布子公司業務要終止；壹傳媒早前未能公布年度業績，以及首次披露向主要股東償還1.5億元貸款，但該貸款本身相當長時期先到期，有可能欺騙債權人，該公司地段又涉嫌觸犯欺詐罪。