昔日東方政情：領養制度懶調整 議員怒轟無人性
玩殘寄養家長 先放棄兒童再申請
政府施政一直被批評離地，但依家睇嚟連最基本嘅人性都欠奉啊！有寄養家長反映，近日想為已寄養近兩年嘅幼兒申請轉為領養，但社會福利署（社署）就要求必須首先放棄寄養兒童，再按領養程序申請同埋輪候。勞工及福利局局長羅致光強調先將兒童從寄養家庭中分離先係以兒童福祉為最大依歸，又稱會視乎唔同個案而定，唔係一刀切喎。不過有議員質疑現行程序僵化，批評政府官僚、無人性啊。
提出口頭質詢嘅議員容海恩話，雖然寄養時間原先限為半年，但有個案因疫情影響照顧有關兒童17至18個月，產生感情，希望轉為領養，但社署百般阻撓，要求先交出兒童。
無視兒童福祉 促拆牆鬆綁
容批評現時無直接程序由寄養家庭轉為領養家庭，而將兒童抽走都違背咗家長照顧兒童嘅原意，亦唔係以兒童福祉為最大考慮囉。佢認為政府應讓寄養家庭繼續照顧兒童，同時申請領養程序，又促政府檢視有關政策，拆牆鬆綁啊。
議員謝偉俊怒斥政府官僚，又暗指羅「IQ博士無人性」，就好似殺倉鼠嘅做法一樣，程序唔靈活，亦都唔明白兒童對家庭嘅需要。議員陳家珮都認為政府應該要有更多同理心，減省繁複程序，安穩嘅生活環境對兒童好重要㗎嘛。另一位議員吳永嘉就質疑政府喺考慮寄養家庭暫託兒童時，都有相關要求同條件啦，會考慮家庭能否帶畀兒童福祉，唔理解寄養同領養家庭之間嘅最大分別。
寄養不同領養 羅致光死撐
羅致光回應指喺一般情況下，社署會先暫停寄養家庭服務，再處理寄養家庭申請成為領養家庭嘅程序，以免影響兒童意願，確保公平性及兒童最大福祉。對於議員批評佢同埋政府無人性，佢就話正正因為人性同埋顧及兒童利益先會設立相應程序喎，因為有例子證明寄養家庭唔適合作為領養家庭。
羅強調，寄養同領養家庭要求有分別，寄養家庭未必符合領養家庭嘅條件。由於領養屬於長遠照顧，而寄養家庭只係為兒童提供適切居所，屬暫時安排。佢舉例指若寄養家長年紀太大，經濟環境又唔理想，就唔適合做領養家庭喇。佢又重申上述安排只係一般情況，部分情況政府當然非常樂意直接畀符合申請要求嘅寄養家庭領養兒童，強調唔係一刀切喎。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
