政情：許正宇恢復職務徐英偉等運到

喺今個月初出席「洪門宴」嘅多名官員及議員已完成在家隔離檢疫程序，我哋都講過民政事務局局長徐英偉未能如期喺今日復職，會由副局長陳積志暫代局長職務，而財經事務及庫務局局長許正宇尋日就喺社交平台貼文，話已經重返辦公室工作喇，發展局政治助理馮英倫就會喺今日復工。特首辦公室話就相關官員出席宴會嘅行為調查後，特首定會對有關官員採取適當行動。

許正宇、財庫局副局長陳浩濂、民政事務局副局長陳積志等11名出席「洪門宴」但毋須檢疫嘅官員，上星期六完成最後檢測並收到無染疫嘅報告，尋日起可以復職。許正宇話喺過去一段時間以視像與同事溝通及掌握最新工作進展，好開心可以親身回到辦公室工作。佢又話將全力以赴籌備接下來嘅工作，包括喺新一個立法年度提交嘅議案，以及向立法會議員介紹財庫局嘅工作。

陳積志署理民政局局長

另外，徐英偉本身尋日完成7日居家監察，但未能喺今日復職，亦未知佢幾時復職，所以會由喺尋日恢復副局長職務嘅陳積志署理埋局長一職先喎。

至於涉事官員嘅調查，特首辦就話特首辦主任陳國基同公務員事務局局長聶德權會調查相關官員出席宴會嘅行為，調查工作完成後，特首定會對有關官員採取適當行動，並向公眾交代喎。