政情：梁繼昌飲茶 蝦餃附送曱甴

話說梁繼昌前日喺Facebook貼出一張蝦餃嘅相，清楚見到一隻差唔多有半隻手指公咁大嘅曱甴喺上面。梁話囡囡已經將成個蝦餃放咗入口，覺有異樣立即吐出，先至赫然見到有隻「小強」！佢叮囑囡囡呢幾日要留意身體有無唔舒服，如果有就要即刻睇醫生。

佢話為免影響其他食客，當時縱有不滿亦無疾言厲色，反正酒樓有向佢哋道歉、加送甜品以及取消該點心嘅入帳。佢話暫時未報食環署，會喺今日聯繫。佢又認為酒樓應該要正本清源，搵出食物有曱甴嘅原因，尤其喺疫症期間更加要注意衞生吖嘛。