政情：聞設小組委員會 內會主席率先落閘

議員鄧家彪提出喺內會轄下成立改革扶貧政策和策略小組委員會，同埋議員劉國勳建議成立北部都會區發展事宜小組委員會，另亦有議員打算成立政策事宜小組委員會，如葛珮帆建議成立發展智慧城市事宜小組委員會等。惟內會主席話，議員有意跟進某啲政策，可以喺事務委員會要求召開會議，而鑑於事務委員會喺下周就會展開工作，希望到時先決定係咪需要喺內會轄下開展小組委員會。

內會主席話音剛落，隨即有議員提出見解。鄧家彪指扶貧工作並非單一委員會範疇，參考過往都係內會負責，加上政務司司長李家超負責香港扶貧工作，認為內會適合啲。另外佢又話事務委員會、小組委員會有人數上限，但關注嘅議員一定超過20人喇。

議員梁美芬就話小組委員會數目有限制，不如嘗試分階段成立，例如先成立5個，否則有其他緊急事項要成立嘅時候，就超出限額喇；葛珮帆就話小組委員會運作唔可以超過一年，倒不如盡快做晒小組委員會工作，跟住就可以開新嘅小組委員會。