政情：紀委斥中委洩密 民主黨一團糟

其實李華明不滿有中委破壞保密原則嘅事件仍持續發酵，事關尋日有報章專欄引述消息，指李華明將獲紀委會從輕發落，係考慮到其知名度較高，咁多年嚟做咗唔少貢獻。

紀委會喺信中提及，指有關專欄內容不準確，質疑中委會不作澄清及處理。紀委會又提到，收到投訴後一直非常小心處理有關聆訊、裁決及處分，亦尊重會員上訴嘅權利及有關保密責任，而裁決書屬限制傳閱文件，所有中委會成員須負上保密責任，即使有回覆傳媒查詢嘅需要，亦全由主席作出回覆，但19日中委會會議當晚10時許，就有人向傳媒透露會議內容，質問「這會是中委會認為適合的方法嗎？」並敦促中委會積極採取有效措施，認真對待保密責任。

事緣民主黨喺立法會選舉前向有意申請該黨人士個人名義支持嘅立法會候選人，發出問卷調查，以決定喺咪批准黨員表態，最終只有荃灣區前區議會副主席李洪波獲批准表態支持劉卓裕。而梁翊婷、蘇逸恒喺未經批准下，以個人身份支持潘焯鴻，而李華明以社工身份支持社福界候選人狄志遠，最終遭到其他黨員向紀律委員會投訴。