政情：事務委員揀舵手 僅司法副主席有競爭

立法會秘書處尋日公布各事務委員會嘅有效提名，結果18個委員會嘅主席全部由上屆議員接手，其中10個事務委員會主席成功冧莊。副主席方面，議員劉國勳成功連任發展事務委員會副主席；議員劉業強擔任環境事務委員會副主席；重返議會嘅陳凱欣同埋鄧家彪分別擔任衞生事務委員會，同埋福利事務委員會嘅副主席。

至於唯一出現競爭嘅就係司法及法律事務委員會副主席一職，由容海恩同林新強競爭。本身上年係保安事務委員會副主席嘅容海恩話，因其所屬政黨內5位黨友議員，各自喺不同嘅事務委員會佔一個席位，並決定由黨友議員黎棟國執掌保安事務委員會副主席以負責相關嘅議題，而佢上年係司法及法律事務委員會委員，今年有興趣爭取副主席一職。對於出現競爭，佢話事前都唔知，不過大家各自有優勢，就公平競爭啦，呢幾日都會瘋狂打電話拉票喇。

另外，18個事務委員會正副主席人數方面，民建聯佔據7個主席同埋兩個副主席席位；經民聯有3個主席同一個副主席；工聯會就有3個主席同一個副主席；自由黨都有3個主席位；G19拎到一個主席同4個副主席；新民黨最少拎到兩個副主席。

其實本身選舉委員會正副主席程序方面，候選人係可以自我介紹政綱、接受提問等，但上屆就出現有議員濫用程序拉布。之後，上屆立法會就通過修訂《議事規則》，列明立法會各委員會嘅選舉主席程序方面，將會由立法會秘書處收到有效提名後再進行選舉會議，主席選舉需30分鐘內完成，否則休會。變相都唔會再出現拉布情況。