政情：大律師公會改選主席 杜淦堃接替夏博義

杜淦堃指法治係香港成功嘅基石，但過去幾年好多人對法治失望、悲觀、或者對法治誤解，甚至攻擊法官，大律師公會將繼續向公眾解說，就法治議題發聲。對於法治已死嘅講法，杜則指其業界仍有好多人繼續堅持維護法治。被問到《港區國安法》是否破壞本港法治，杜表示國安法係香港法律嘅一部分，理解社會上係有擔心嘅聲音，但現時仍屬初步階段，同需要更多有關案例，但相信法官會仔細審議，希望公眾給予法庭同司法制度時間。至於政府將重推《基本法》第23條立法，杜認為立法係憲制責任，希望條例草案推出時能提出意見，將會積極參與其中。

杜強調公會係專業團體，不應處理同商討政治事宜，對於公會被批評政治化，杜話社會上有不同看法，難以控制。但一啲法治同政治重疊嘅事件，就要好好拿捏平衡。

杜淦堃自2017年起獲任命為高等法院暫委法官，處理商業及民事訴訟，亦曾接辦代表政府嘅官司。毛樂禮則專長商業糾紛及公司案件，2014年違法佔領行動期間代表冠忠巴士入稟申請禁制令。陳政龍主打刑事案件，曾於港台《鏗鏘集》編導蔡玉玲查冊案代表辯方、喺前特首曾蔭權瀆職案中係辯護律師團隊成員之一。