政情：劉聖雪現身公仔箱教防騙

話說近日反詐騙協調中心（ADCC）拍咗新嘅電視廣告，教市民唔好咁容易相信騙徒。喺廣告入面，有幾個市民分別面對冒認執法人員、網上情騙以及求職騙案，面對騙徒，佢哋都不約而同咁講「睬你都傻！」之後就見到Dana出場喎，佢身穿OL服裝，收到一個由假銀行寄嚟嘅手機短訊，指佢嘅帳戶顯示異常，要求佢綁定用戶資料，否則帳戶就會被凍結，再附上一個假銀行嘅網址。Dana見狀，即刻話「同我上開嘅網址唔同，睬你都傻！」

Dana回覆本報時話最近收到好多街坊反映遇到騙案，包羅萬有，假冒海關、速遞公司、衞生署等等，而適逢有間中介公司問佢有無興趣幫反詐騙協調中心拍廣告，佢就二話不說應承喇！佢仲透露，上一次拍電視廣告，已經係5年前嘅禁毒宣傳片喇，雖然都有拍攝經驗，但佢話每次拍攝都好有新鮮感，因為次次都有唔同嘅角色同埋場景，仲話若果之後再有機會都有興趣參與啊！