政情：做好功課先出席 陳健波告誡官員 開會勿遊花園

波哥話上年度財委會批出5年來最多嘅項目，但開會時間係5年嚟最少嘅，有人批評用咁少時間審批咁多項目，但事實係以前民主派議員頻頻「拉布」，搞到佢要用太多時間處理秩序同埋程序，並無代表有認真審議政府撥款嘅申請。佢話香港同議會過去多年浪費咗唔少寶貴嘅光陰，令到香港整體競爭力不斷下跌，好多老、大、難嘅民生問題都未能解決。

隨着民主派議員離任，新議會、新人事，佢相信市民都期望新議會能夠做到監察政府嘅同時，又配合政府施政。喺財委會方面，佢話多謝議員支持，令佢連任擔任主席，希望未來新舊議員能夠齊心一致，認真審核各項政府議案，確保各項開支用得其所。

之不過，就算議員唔再拖慢議事程序，但官員嘅表現又如何呢？波哥就話官員仍有好大嘅改善空間，仲話有啲人就唔見有進步添，又批評官員喺財委會會議上，只係機械式咁重複政府立場，建議官員放棄統一口徑回應，強調「錯就要認」，唔應該再隱瞞。佢又話官員當然要提升自己，叫官員千祈唔好覺得議員嘅配合係必然嘅，官員嚟立法會出席會議一定要做好功課，唔可以一直遊花園，得過且過，咁樣對唔住市民嘅行為，更可能會畀議員嚴厲咁批評㗎。

佢又形容上屆財委會可以話係苦盡甘來、恍如隔世，而今屆就希望可以「金」來，係金錢嘅金啊！期望香港經濟復甦，而政府都調撥更多嘅資源搞好經濟同埋民生喇！