政情：新手攀山唔知驚朱順雅狼狽登頂

雖有話「欺山莫欺水」，但唔代表征服山峰係輕而易舉嘅事。屯門前區議員朱順雅雖然係一位長跑好手，然而較少涉及越野嘅佢，日前喺友人慫恿之下攀登獅子山，仲要揀條最困難嘅路段，儘管最終都安全登頂，但佢就形容自己「一仆一碌」咁囉。

形容自己一仆一碌

朱順雅喺社交平台中提到，自己過去只有幾次行家樂徑嘅經驗，行山方面可以話係新手，之不過有一位具30年行山經驗嘅朋友，認為佢早前第一次行山，就順利通過分流、二澳嘅爆林、同綑邊特訓，順利完成18公里路程，係有能力徒手攀上495米高嘅獅子山。結果朱順雅同友人喺獅子山山腰，手腳並用咁一直攀爬至獅子山尾，再由獅子山尾前往獅子山頭。佢話沿途嘅路徑並唔明顯，只能依照繫上樹木嘅絲帶嚟確認方向，而沿途亦甚少休息，事關山上寒冷，加上佢衣衫單薄，頂多咬啖麵包就繼續前進，以免着涼。佢以「一仆一碌」嚟形容登頂過程，睇嚟都幾狼狽喎。

完成攀登獅子山之後，朱順雅預料友人下次揀選山徑路段嘅難度一定比今次更大，但佢覺得只要咬緊牙關同埋唔好心急，有信心可以應付咁話。