政情：立會新丁比例高 薛浩然驚唔靠譜

薛浩然日前喺一段網絡視頻中提到，新一屆立法會有90位議員，當中政治素人竟超過六成，而呢批人好多都面目模糊，亦甚少聽聞佢哋曾參與乜嘢社會服務，更遑論議政經驗。薛強調並非對呢批新丁議員持有偏見，只係任何社會制度都要有延續性、同有所傳承。須知道立法會係繼行政同司法外，香港政制3大架構之一，負責監督特區政府、財政以及公帑嘅運用，同埋通過一啲同你我都息息相關嘅法例，依家突然之間，咁多新丁議員屬於市民眼中不見經傳之徒，議會又點樣傳承呢？一般市民又何以安心呢？

薛又以最近揭發嘅「洪門宴」為例，當中就涉及好多位新丁議員，反映呢啲人政治觸覺低、唔夠成熟，雖然後果頂多係去竹篙灣隔離21日，但若果錯誤發生喺議事堂上，問題就嚴重喇。所以佢認為完善選舉制度，並唔能夠完全帶領香港邁向金光大道，然而完善選舉制度既已落實，大家就要服膺於呢個現狀。