政情：立會避疫 欲施故技 遙距開會 各有顧忌

內會主席話，新冠肺炎發展嚴峻，立法會要做好準備，希望下周三審議有關所有立法會會議能否喺緊急情況下，以遙距方式進行嘅議案。多位議員表示支持，認為要準備立法會喺疫情緊急嘅情況下，都繼續履行憲制職能。議員林健鋒話，雖然立法會大會未試過以視像形式進行，但亦唔應該拒絕嘗試；議員廖長江話，相關措施其實有法律基礎，只欠運作細則，希望有時間仔細研究。

議員盧偉國同狄志遠就擔心法律問題，希望盡快解決點樣遙距投票；議員陳克勤就話，議員希望進行實體會議，但極端情況難以避免。議員鄧飛批評唔少政府部門，實際上不再執行居家辦公，認為立法會遙距開會對社會有良好示範。

內會主席話，相關條例就算得到通過都唔係立即啟動，係需要各委員會主席判斷情況，同委員商量後先至得以啟動。法律顧問話，該項議案會指定日期，並會參考防疫規例，亦已經考慮法律問題。另外，內會通過議員林哲玄及林順潮逾期加入委員會嘅申請。

其實下周三嘅大會，仲會討論議員陳家珮同埋黎棟國嘅議員議案，但佢哋早前出席「洪門宴」，其後接受主席梁君彥勸喻逗留家中，避免出席剛過去嘅立法會首次大會。但下次大會能否出席呢？陳家珮回覆話，今屆立法會有90位議員，如果放棄提出議員議案，之後就可能冇乜機會提出喇，所以都傾向出席下次大會，而佢所屬嘅政黨就會喺下周一（17日）開會決定。佢仲話已經做咗兩次檢測，今日會做第3次，如果有需要唔介意再去做多次檢測，以釋除公眾疑慮咁話。