政情：G19爆升變G32 工聯會 勞聯疑似結盟

話說有一份32人名單，當中包括咗G19、工聯會同勞聯10名議員，仲有選委會界別嘅何君堯同陳凱欣，仲有地產及建造界嘅龍漢標。呢份名單係由立法會秘書處發畀議員嘅，係由G19之一嘅建築、測量、都市規劃及園境界議員謝偉銓以團體名義申請加入18個事務委員會，隨即惹起同工會結盟嘅猜測。

謝偉銓仲特別澄清，唔想有任何誤會，仲話絕冇結盟呢回事，只係為咗爭取讓最多成員加入心儀嘅事務委員會，G19先同工聯會、勞聯及另外3位獨立議員聯合處理申請加入事務委員會事宜，互惠互利，但唔代表G19工聯會及勞聯會喺其他方面結盟或合作，亦唔代表嗰3位獨立議員已加入G19。

其實搞出呢個誤會，都係因為改咗《議事規則》，事務委員會有人數上限，兼且以名單制去分配席位數目，單打獨鬥嘅議員較難入，埋堆嘅話就容易內部分配嘞！