政情：議事廳編位原則 陳克勤爆有人面左左

陳克勤指議員座位嘅編排可分幾個階段，回歸前嘅座位係論資排輩嘅，資深議員座席會安排較前嘅位置；而第二個階段就係回歸後、完善選舉制度前，安排座位基本上靠議員協商。而建制派多數坐喺會議廳中間嘅位置，而民主派議員則坐喺主席嘅左方，原因係特首到立法會進行答問大會或宣讀《施政報告》時，都會由正門經過中間通道步往主席台，若議會鬥爭激烈，民主派議員坐喺中間，特首嚟開會，出入就有困難。

完善選舉制度後，政黨角色無以往咁強，選委會界別議員就算有唔同嘅政黨背景都會坐埋一齊。至於地區直選同功能界別議員，就繼續採用協商方式。陳話自己所屬嘅政黨議員都係坐番上屆議會嘅位置，由資深議員夾一個新議員坐，希望新舊議員之間有照應喎。

最後陳被問到，有冇議員同佢講唔想同邊個議員坐呢？陳竟然話有喎！佢仲爆呢兩個議員仲係同一個政黨添！但當佢將兩人編為左鄰右里時，佢哋就話唔想一齊坐，後來陳克勤先知道係有原因嘅，不過具體情況就唔講啦，唔開名亦唔講邊個政黨喎！