昔日東方政情：天寒懶得郁 在囚趙恩來搣唔走肥肉
唔少被判囚嘅社運人士，都會同自己訂立一啲目標以免虛度光陰。目前喺白沙灣懲教所服刑嘅前支聯會常委、前荃灣區議員趙恩來，入獄之初曾打算減肥，之不過近日佢話減磅失敗，而原因就係天氣轉冷，懶得活動咁話。
專心睇書學木工
趙恩來因涉前年六四集會案，被控煽惑他人參與未經批准集結，去年9月遭法庭判囚8個月。而佢嘅社交專頁日前就上載佢嘅獄中信，話自己入獄3個月，算係適應監房嘅生活節奏，雖然在囚嘅飲食比較清淡，但自己未能成功減磅，相信係同天氣寒冷，疏於運動有關。佢又話鐵窗之下同外界聯絡斷絕，難得耳根清淨，忘卻俗務煩囂，可以專注咁細讀各類書籍，而最近就閱讀中國近代史嘅書籍居多。
早前講過自己喺監獄做木工嘅趙恩來話，依家佢仍然學習木工工藝，準備考取木工證書、平安卡，但最重要係可以消磨時間喎！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
