政情：財會內會座位分陣營 見隊形

由功能界別同選委會界別組成嘅G19進駐咗最左邊嘅座位，亦即係上屆民主派坐嘅位置，而隔籬嗰排本來係本土自決派嘅座位，依家係新民黨同部分選委會界別議員坐咗。

會議廳嘅座位表日前出爐，粗略咁去區分，由左至右係選委會界別、功能界別同地區直選，然而會議室1就係分黨派，坐喺左邊首同第二排第一個位嘅係幾個選委會界別議員，之後排落去嘅都係G19嘅成員。

工聯會就打散咗嚟坐，其中5個坐喺主席台前嘅第一排，陸頌雄坐番自己個位，第二排主要係自由黨，第3排係經民聯5名成員同3名民建聯成員，但經民聯嘅陸瀚民零零舍舍坐咗喺第4排，隔籬係退咗黨嘅梁文廣，跟住就係民建聯，最後排亦係民建聯。值得留意嘅係該黨嘅主席同3名副主席都坐喺最後排，唔知係咪要睇晒成個場？

至於最右邊嗰排座位，首排兩個位係勞聯，第二排係工聯會，第3排係4個直選議員，最後排係選委會界別同功能界別嘅議員，唯一非建制派議員狄志遠坐最後一個位。