政情：立法會爭櫈仔行管會名單出爐事務委會未傾掂數

立法會明日舉行首次大會，隨後陸續選舉各個委員會正、副主席。據了解，行政管理委員會成員由建制派「正副班長」、3大界別聯繫人及政黨代表組成，而建制派各板塊代表尋日碰頭，初步討論18個事務委員會正、副主席人選，部分較少競爭嘅委員會主席，擬由連任議員繼續擔任。但由於事務委員會人數設限，議員可謂「爭崩頭」，所以部分委員會正副主席人選都有待商榷。

在行管會方面，據了解，成員包括主席梁君彥之外，料仲有建制派「班長」廖長江、「副班長」李慧琼；3大界別6大聯繫人，即地區直選有陳克勤、楊永杰；功能組別陳振英、邵家輝，及選委界別嘅馬逢國及麥美娟。另外，亦有4人屬政黨代表，包括張宇人、葉劉淑儀、盧偉國同吳秋北。

據悉，初步料盧偉國及謝偉銓分別任工務小組委員會正副主席、人事編制小組委員會主席由葉劉淑儀出任、議事規則委員會主席繼續由謝偉俊擔任，至於立法會政府帳目委員會主席料為陳振英，接替未有競逐連任嘅前主席石禮謙。

建制派傾向由舊人坐多陣

建制派初步傾向大部分事務委員會主席「照舊」由舊人坐多陣，或作最少調動。例如，由張國鈞任司法及法律事務委員會主席、周浩鼎任政制事務委員會主席、梁美芬任教育事務委員會主席及陳克勤任保安事務委員會主席。部分事務委員會人選有所調動，包括謝偉銓或接替盧偉國任發展事務委員會主席，至於房屋事務委員會主席一位較搶手，最後料由麥美娟出任。

至於作為議會中唯一嘅非建制派狄志遠就話，得悉尋日有相關會議舉行，但就未有參與。佢又話希望首選係加入福利事務委員會，並競逐副主席一職。但據了解，原來唔少議員對該委員會主席一位都好感興趣，所以至今都未能協調成功。

實際上，內務委員會同財務委員會正副主席喺無競爭嘅情況下，由上年度嘅4位正副主席成功連任，包括財委會主席陳健波同內委會主席李慧琼。而當選後陳健波隨即公布本周五會議，將安排財金官員簡報香港整體經濟最新狀況及進行新一年度財政預算案諮詢。