政情：防疫收緊打亂部署 玩殘陳智遠

陳智遠開頭十分慶幸，話市況不景但去年公司嘅業務反而有增長，仲「逆市擴充」請多兩個同事添。又指出年就係公司成立10周年，屆時要做到香港永續旅遊最領先嘅公司，以優質服務為客人提供價值，同時透過公司營運創造社會影響。佢又話去年公司表現唔錯，同事都有得出花紅同加人工，而佢亦思考點樣善用盈餘，創造價值。其中一項就係用自己嘅資源推動保育運動，舊年有主教山，今年會嘗試挽救彌敦道190號呢幢舊建築。佢仲透露另一項「投資」，就係做電影嘅聯合監製喎，指冇乜嘢比起電影更能推廣文化旅遊嘅理念。

之不過佢講完冇幾耐，政府宣布嘅防疫新措施就打亂咗佢嘅部署。陳坦言對佢嘅影響同損失都不菲，如本月下旬嘅實體活動要押後，精心籌備嘅電影場景遊都要煞停，而某啲團就要即刻變陣轉做「虛擬遊」，公司亦立即重啟居家上班嘅安排。佢話按目前嘅發展，兩星期後未必可以「清零」，總之呢個月都難捱㗎喇。不過相較之下，租車公司同食肆更無奈，佢呼籲大家有能力嘅話，就幫襯啲食到應一應嘅小店同中小企。