政情：疫下想減肥 健身室關閉 黃兆健諗計 誓做大隻仔

黃兆健喺社交專頁交代近況，佢話2019年後經常藉詞工作、選舉、湊貓、煮飯而疏於健身，後來某日佢自我質問「想唔想變得更好？」於是就徹底改變生活嘞，加上失業後佢搵到一間健身室，結果佢由一個肥仔，變成冇咁肥嘅肥仔，依家目測自己嘅肌肉量亦應該回復3年前嘅水平，仲打算自我挑戰，未來兩個月減多一成嘅體脂，誓要做個大隻仔喎。

之不過，健身室尋日開始關閉，佢大嘆減到一半先至封，惟有搬個啞鈴返屋企，改為家居健身，再配合新菜單，睇吓14日後身體到底會有咩變化咁話。