政情：阻緩氣候暖化勢持續 李偉才﹕除非每日供電4小時

李偉才指，自然情況下，大氣層嘅空氣化學組成應該係好穩定，然而自1958年人類首次量度二氧化碳水平開始，大氣中嘅碳濃度就不斷上升，而氣溫亦隨之水漲船高。雖然喺1981年，有科學家發表學術論文，指氣候暖化嘅趨勢持續，全球將邁向危險境地，可惜40年來人類只係不斷咁召開氣候高峰會，雖有協議但往往淪為一紙具文，而早前嘅格拉斯哥氣候峰會，好多人都對於控制氣溫上升1.5度嘅目標，持悲觀態度。

雖然人類正努力開發「潔淨能源」，但李偉才指目前人類嘅能源供應，化石燃料佔咗八成。況且全球各國都努力追求經濟增長，意味減排目標更難達到，除非限制供電一日4小時。雖然氣候暖化牽涉到人類嘅生死存亡，之但係任何政客都唔敢阻慢經濟增長，否則就係政治自殺咁話。