政情：鐘樓重鳴 丁新豹憶小販叫賣聲

丁新豹喺一則網上短片中提到，鐘樓係尖沙咀火車站嘅一部分，佢記得自己最後一次使用尖沙咀火車站，係經廣州去桂林。佢話當時雖然係朝早登上火車，然而車廂無燈光，內裏簡直漆黑一片，而車廂外就有啲托住一個個竹籮嘅小販喺度叫賣，兜售話梅同甘草等嘅零食，而且仲係一路沿住月台逐個車廂叫賣。佢話嗰種聲音，就算至今仍記憶猶新，之不過，呢種叫賣聲喺香港已經鮮有聽聞，依家回想昔日反而有一種親切感。

講到已消失嘅尖沙咀火車站，佢話不但外觀典雅，其設計既傳統又周到，就算落車都感到尊嚴。佢話鐘樓去到1950年就無咗聲，得番大鐘報時，嫌美中不足咁話。