政情：黃君健話九大簋 僅百年前面世

話說九大簋唔止係食咁簡單，其實代表團結鄉族。陳建議政府喺教育方面做多啲工夫，包括將舞麒麟擺入部分學校課程，仲希望學校嘅歷史課講師可以接觸鄉議局，建立網絡、互相支援。而佢都會同原居民保持以客家話互相問候，從而保持村內嘅文化傳承喇。

至於嶺南大學香港與華南歷史研究部研究發展經理黃君健就話，好多人都以為九大簋歷史悠久，實際上只有約100年左右咋。黃君健話九大簋歷史要追溯到清末，當時需要動員全村、群策群力先可以完成九大簋盛宴。但可惜現代鄉村唔再係「放低鋤頭就幫手」，部分原居民喺80年代已經住喺城市、少返鄉村，好難再維持傳統，直至近年鄉議局喺大型場合安排九大簋盛宴，先開始得以復興。可惜好景不長，疫情妨礙聚集群眾，以及有關食材由內地輸港，令文化傳承再次陷入低谷呀。