政情：掌民政署大花筒兼失職謝小華竟升職

主管地區發展事務嘅民政事務總署過去惹起唔少爭議，被轟亂使公帑同失職。之但係，民政總署署長謝小華仕途就未有受太大影響，仲有得升職！政府尋日就宣布，謝將喺本月17日接替服務政府34年並已展開退休前休假嘅鄭美施，出任環境局常任秘書長/環境保護署署長。

月中接任環境局常秘

講到亂使公帑，相信市民都仲記得造價高達5,000萬元嘅觀塘海濱音樂噴泉，正式啟用一日後就壞咗，被嘲如「豆腐渣噴泉」。民政總署唔單止被批興建「小白象」工程，喺地區民生工作上更被斥失職，包括未有推動改善「三無大廈」安全及維護，到舊樓出現火警意外時先至急急腳做嘢補鑊。其實喺2016年起出任署長一職嘅謝小華，真係難辭其咎！

推動環保不力鄭美施退休

至於鄭美施都唔係好得去邊！政府曾額外投放數億元喺新能源運輸基金，以資助形式鼓勵運輸業試用電動車輛。曾有本地巴士公司為響應計劃，引入內地生產嘅電動巴士，但就故障頻生，要耗費更多時間維修，被批喺呢方面嘅工作做得唔好。

至於香港海岸垃圾問題亦一直為人詬病，上年審計署發表報告，批評政府跨部門處理海上垃圾表現不力，環保署喺立法會更成為箭靶，被炮轟對清潔海岸垃圾反應遲鈍，鄭更被議員鬧到「一鑊甘」添啊！