政情：目中無人要解畫？ 蔡志強認記性差

蔡話起初以為自己記性差，其後發現記其他事物冇問題，唯獨係記唔到人。佢話只認得自己啲「九族親戚」，部分經常傾談嘅同事，以及曾一齊食過幾次飯、或社交平台附有相片及姓名嘅小部分網友。

唔認得人嘅佢曾經遇上唔少尷尬場面，譬如試過喺音樂會散場，突然有陌生男子同佢寒暄近半個鐘，最後提及大家嘅工作近況，先至發現雙方都認錯人！佢又話自己已經訓練到對住任何人都可以吹一餐喎，由於經常有陌生人向佢打招呼，為咗畀人感覺禮貌啲，久而久之就練成一身「吹水」本領，務求盡快加深印象同套多啲料。