政情：大埔區會副主席補選無共識大會臨時被取消

大埔區議會副主席劉勇威日前喺被「催促」下，於除夕日履行「兩年一屆」協議辭任副主席，按理尋日大埔區議會舉行大會補選副主席，但可能因爭位而傾唔掂數，秘書處未收到有意競逐副主席嘅區議員提名，依規例唔可以召開大會，咁幾時先至開到會呢？該區區議會主席毛家俊就話協商需時，相信未來一兩次大會都未必可如期舉行啊。

翻查大埔區議會網頁，顯示原定尋日舉行嘅區議會大會「會議未能如期舉行」，而下一次大會就要等到3月。毛家俊回覆查詢時話，早前就取消會議一事向秘書處查詢，引述指根據《區議會條例》每個區議會大會須有正副主席在場先可正式舉行。佢話收到劉請辭至今只係幾日嘅事，加上未收到有區議員正式表達參選意願，所以打算喺稍後再次詢問現任區議員嘅諗法。

協商需時有排等

至於目標幾時可以完成協商呢？毛就話當然愈快愈好，之不過現任區議員之間對於未來工作方向存有分歧，相信要較長時間先可以作出適當嘅決定。之但係可能呢一、兩次區議會大會就未必可如期舉行喇！

有該區區議員話，都係尋日朝早前往開會途中先至收到秘書處通知，因為未收到提名所以取消會議，要待下次會議再處理。佢話至今都未有人主動聯絡佢就呢個議題作討論，相信大家都冇咩意欲傾住。佢又話毛家俊作為主席，有責任邀約相關區議員討論，否則唔知點樣先至可以解決補選副主席問題。