政情：梁君彥連任立會主席 叮囑議員唔好拖後腿

對於自動連任，梁君彥表示榮幸得到新、舊、涉不同界別嘅議員支持，希望能繼續帶領立法會。回想上屆立法會屢現拉布同惡意破壞嘅情況，佢話感到步步為營。而今屆立法會喺完善選舉制度下，相信立法同行政機關能良性互動，而議員亦會共同努力，唔再以拉政府後腿嘅態度議事，及希望立法會能繼續協助國家安全嘅工作，做到民心回歸，以及協助政府處理抗疫同民生嘅工作。佢坦言上述工作絕不容易，但佢會繼續同政府保持溝通，並全力以赴，令香港喺一國兩制下更好咁融入國家大局，更上一層樓。

提及今屆立法會議席大幅上升，佢認為「人多好做作」，而新嘅議事規則限制議員加入事務委員會嘅數量，相信更能聚焦議題，深入探討，解決香港嘅深層次矛盾。佢又指，將於2月中就《施政報告》辯論，議員亦忙於加入委員會，新議員都需要時間熟習，相信會非常忙碌。

被問到有議員嫌中信大廈議辦嘅安排不足，佢話自己身為第六屆行管會主席，有責任令第7屆立法會順利運作。又認為中信大廈已經係最好嘅選擇，能夠令議員喺短時間內到立法會開會，況且亦有基本裝修，承認雖然並非完美，但議員有資金可以自己再購置物品，又相信立法會秘書處會繼續協助議員。