政情：大埔區會今補選副主席 名單成謎

撇除劉勇威同埋主席毛家俊，大埔仲有6位區議員，而外界曾傳出區議員區鎮濠、何偉霖同姚鈞豪都對呢個位有興趣。

不過，何偉霖早前就透露無意欲做副主席，亦都無收到相關消息，對於劉勇威辭任副主席一事，佢都唔太了解，亦都未知嚟緊嘅大會上，會唔會加插臨時動議討論副主席選舉，而姚鈞豪早前都講過相似內容，表示無意欲做副主席，睇嚟結果要聽日先揭盅喇！

毛家俊就透露，有議員已經私底下協商緊補選副主席一職，佢都希望大家可以有共識，一旦傾唔掂數，自己都會幫手協商下。而秘書處都向所有議員發出咗正式電郵，指已經收到劉勇威辭任副主席，亦會喺今日大會首個議程上補選副主席，而大埔區會網頁已經顯示劉勇威不再擔任副主席一職。

事緣有泛民主派議員於大埔區當選後，曾協議區議會主席同副主席兩年一屆，即係任期至去年12月31日結束，但副主席劉勇威曾一度「潛水」，最終搞到區議員姚鈞豪喺Facebook專頁「公審」佢，擔心劉唔肯尊重協議「退位」。最終劉都有現身，並辭去副主席。