政情：選立會主席傳惡鬥梁君彥連任遇對手？

陳健波往績搭夠梁美芬率先擰頭

新一屆立法會會期前日正式展開，全體90名議員今日進行宣誓儀式，緊接而來嘅係立法會主席選舉。主席只得一個，然而覬覦者眾，目前除上屆立法會主席梁君彥有意連任，枱面上無人角逐，但其實枱底多人暗中角力。政圈傳出內務委員會主席李慧琼、新民黨主席葉劉淑儀同財務委員會主席陳健波等有意競選之外，最新有指梁君彥黨友、喺選舉委員會界別獲得1,348票，成為「票后」嘅梁美芬同樣有意競選主席職務。但梁美芬否認「爭位」，仲話梁君彥連任應「冇問題」。

梁君彥係工業界（一）功能界別議員，2016年出任立法會主席，一上任就爆出國籍風波，被質疑擁有英國國籍不合乎《基本法》列明對立法會主席嘅規定，最終要放棄英籍，連立法會議事規則委員會亦要修改選舉主席嘅規定。其後經歷宣誓風波、反對修訂《逃犯條例》風波、立法會延任一年同泛民總辭等，佢曾感嘆過去5年議會經歷驚濤駭浪。今屆立法會選舉，佢首遇競爭，最終成功連任，當選後亦明言考慮爭取連任主席。

上屆處理內會風波陳獲好評

正當以為今屆主席之位手到拿來之際，政圈盛傳主席一位有多人競爭，當中以陳健波呼聲最高，有指陳近年主持財委會作風硬朗，獲不少好評，加上上屆處理內會選舉風波立功，同時又敢於批評官員喺立法會會議上表現差、準備不足、回答問題遊花園等。

有指以為勝券在握嘅梁君彥近日相當「頭痕」，就連其黨友梁美芬亦加入戰局，近日「狂拉票」話想做立法會主席，更有指佢先從黨內着手試探，令梁君彥主席之位「危危乎」。過去就有指梁君彥因「傾好」可以連任主席一職，為此放棄讓其兒子、全國青聯副主席梁宏正參選立法會，若最終主席之位不保，梁便陷入「雙失」局面。

梁美芬話做梁君彥提名和議人

梁美芬回覆我哋查詢時話，由於梁君彥已清楚表明競選意願，又有經驗，作為黨友理應支持，相信會短時間內公布。佢承認最近確實有聽聞過自己有意爭奪主席之位嘅講法，並予以否認，話自己「冇諗過」。對於之前有傳主席一職冇內定人選將「自由競爭」，換言之，梁君彥會連任困難？但據梁美芬了解，相信問題已經解決，梁君彥連任應該「冇問題」。

對於拉票講法，佢話絕無此事，坦言確有黨外人士建議過佢出選，但經民聯對派出梁君彥出選、當選毫無懸念，更指自己已經答應做提名和議人！

有關早前外界指經民聯黨內爭奪黨友石禮謙離任後留下嘅海景辦公室，梁美芬同樣話冇咁嘅事，又話自己建議抽籤解決，但結果無人抽，故料由佢「進駐」，現時正「諗緊辦公室啲擺位」。