政情：田北辰：廉租助後生仔創業

田北辰話時下香港年輕人創業往往要捱貴租，通常幾個月就資金耗盡，人工都無得出就「散Band」。

鑑於政府打算將洪水橋等地規劃為現代服務區，發展具有3,000萬呎商業樓面嘅消閒中心，因此佢向發展局建議，賣地條款要加入條件，日後發展商須撥約3成面積，以市值3成租金，3年廉租予香港年輕人創業，咁就可以喺營運中掌握財務管理、合約條文同相關法律，而3年租約就等於畀機會佢哋交學費累積經驗。

田北辰又認為，時下嘅年輕人唔係話要發大財，亦無話一定要住大屋，佢哋只係想投身自己喜歡嘅工作，從而自食其力。然而香港天價嘅租金又構成創業嘅障礙。雖然呢啲現象人盡皆知，但政府多年來都好似冇乜動作咁囉。