政情：姚思榮 鍾國斌 重投老本行

經歷9年嘅議員生涯，最令姚思榮記憶深刻嘅事，就係旅遊業大起大落。佢話旅遊業喺2018年去到高峰，但黑暴同疫情令旅遊業深受打擊，至今都係冰封狀態，始終通關先可以渡過難關。佢寄語姚柏良要繼續努力，提升本港旅遊業水平。

至於姚思榮嘅新工作崗位，係喺中國旅遊集團旅行服務有限公司擔任董事，其職責需要面對香港市場之餘，仲要面向內地，之不過近年因疫情關係同內地市場接觸少，都要追番啲進度。

過去係立法會建制派功能組別六人組（G6）一員嘅姚思榮，話G6係喺偶然嘅情況之下建立，雖然並非傳統政黨但都係緊密嘅組織，聽聞G6即將擴充，佢都十分支持，希望可以為政府帶來更加專業嘅視野，適當地畀壓力政府，更有效咁改善政府嘅官僚作風。

至於曾歷兩屆立法會嘅Felix，卸下議員職務之後就會回歸公司，要重新追番啲生意咁話，況且有佢坐鎮，啲客會放心啲喎。

對於接任紡織及製衣業界議席嘅陳祖恒（Sunny），Felix希望佢可以遵守競選時嘅諾言。雖然選戰過後兩人並無聯絡，但Felix話樂意同對方分享經驗。

Felix提及今屆議會有三分二嘅議員都係議會新丁，對比過往通常都三分一係新人有極大分別，佢相信一眾新丁都會感到壓力，事關選舉結束後約兩星期就投入議會工作，以佢所知仲有唔少人未請到政助，令佢不禁回想，當年佢初入議會，即使有政黨背景，仍需兩年時間熟悉議會工作，聽落都好辛苦呀。

至於業界定位方面，Felix話自己已經不在其位，不便評論，但有咩求助都會盡幫嘅。由於已非議員身份，Felix亦須退下黨魁一職，但會否喺黨內擔任其他職位，例如黨主席呢？Felix笑稱自己冇乜要求，但要待黨內分工，以及由身為議員嘅黨團決定未來嘅大方向。

Felix未能夠成功連任，惹來佢同中央嘅關係出咗問題嘅揣測。Felix感慨話香港只係一個小地方，而中央係處理國家大事，好難連咁細微嘅嘢都管埋「唔好吓吓入晒中央數先得o架」。佢又指，過去一直同中聯辦溝通良好，但卸任後都只係一個普通市民，同中央溝通嘅工作都係交番畀議員做啦。