政情：姚鈞豪年尾追「債」 促劉勇威辭區會副主席

大埔區議員姚鈞豪尋日喺社交平台貼文，指2019年尾民主派17位準區議員開會，講明新一屆區議會正副主席兩年一屆，任期由2020年去到2021年年尾，即係今日。但當時一口應承嘅副主席，到依家都無覆過究竟佢係咪會尊重呢個協議？

其實姚仲未進行區議員宣誓，喺貼文中佢話擔心唔知幾時又宣誓又DQ（被取消議員資格）。

由於該區區議會早前已補選主席，毛家俊抽籤勝出，而姚嘅矛頭直指現任副主席劉勇威。而喺佢嘅貼文甫出，亦有泛民前區議員和應「請尊重當初的協議」，甚至係有前區議員話要「尋人」，指名道姓係劉勇威。

姚指曾多次嘗試聯絡劉不果，而佢強調無意競逐副主席，但最重要係尊重協議，尤其是今日到期，劉必須作出回應。本報亦曾嘗試接觸劉，但未獲回覆。