政情：現身畫展 方黃吉雯：文化風氣須時凝聚

方太日前出席一水墨畫展覽嘅傳媒預展，期間佢就提到，香港係一個現代化城市，點樣界定文化都有好多方法，而建立文化需要好長時間同過程，亦都要市民支持及認同，繼而建立一個基礎，加深大眾之間對文化嘅探討。

被問到今次展覽嘅困難，方太話礙於疫情，以致收集畫作需時，加上好多內地畫家都嚟唔到香港。之不過今次展覽上嘅作品，香港同內地嘅畫家佔咗大半。佢話香港雖然係一個彈丸之地，但都有一個凝聚力畀畫家發展。佢仲希望有藝術館可以畀畫作放耐啲，等多啲市民可以欣賞。

至於同場參展嘅畫家黃偉建，佢有一幅描述彩虹邨嘅作品，希望市民思考公屋嘅功用，同時希望透過畫作，呼籲政府解決基層住屋問題，而佢亦苦惱於「土地不足」嘅問題，慨嘆工作室狹小，有時要喺地下度畫畫，結果搞到腰骨痛添。