政情：狗仔被綁林紹輝議辦 惹棄養疑雲

話說尋日下晝，林喺Facebook貼文，話有職員返辦事處時發現鐵閘外綁住一隻咖啡色唐狗，睇番閉路電視，先知喺下晝3點左右，有一個黑衫男子將呢隻戴有狗帶嘅狗狗帶嚟辦事處。職員因為驚狗仔凍，所以已經將狗仔帶咗入辦事處。

佢隨文貼上狗仔嘅照片，詢問附近居民有冇走失狗隻，並作出緊急呼籲，希望黑衫男快啲現身，交代狗仔究竟從何而來？又呼籲狗義工或街坊廣傳消息。有唔少網民都留言心痛狗仔，喺咁凍嘅天氣被遺棄，有人就叫林畀多少少時間，睇吓搵唔搵到真正嘅主人，或者睇吓有冇人願意收養，另外仲有網民表示可以幫手暫託或者收養狗仔。

好彩事隔大約一個鐘，有居民致電林嘅辦事處，指狗仔原來喺城門水塘附近有人飼養，叫做「吉祥」，係一隻狗女嚟，不幸走失咗，主人由尋日朝早已經開始尋犬，好彩最後搵得番咋，而吉祥都返咗屋企喇！狗仔可以同主人團聚固然係好事，但係點解會被綁喺議辦門口？同埋黑衣人點解咁做？似乎仲有謎團未解喎。