昔日東方政情：狄志遠欲拒還迎建制 隨時入群傾偈
新一屆立法會90個議席全部選出，有人話過參選得嘅都係建制嘅一部分，而唯一非建制派嘅社福界候任議員狄志遠亦曾經講過，唔排除喺民生議題上同建制派合作爭取。佢尋日出席電視節目時再被問到會唔會加入建制派嘅通訊群組，就話無所謂喎。究竟係咪咁無所謂呢？大家要拭目以待。
身為唯一嘅非建制議員，將來要點同其他議員相處呢？一個人孤零零又會唔會考慮「結盟」？佢喺電視節目中話，相信就個別政策或議題同建制派都有合作空間嘅，但暫時唔會同其他人結盟，因為覺得大家喺政治嘅訴求上有唔同意見，如果結盟嘅話，好似會令人覺得佢淡化咗本身嘅政治訴求，佢唔想有咁嘅形象喎。
至於會唔會加入建制派嘅WhatsApp通訊群組，佢就話依家已經有一個90人、包括整個立法會議員嘅WhatsApp群組喇。佢認為，若果係聊天交流嘅話都無乜所謂，因為WhatsApp群組只係畀人溝通咁話喎。
佢唔抗拒同建制合作早排已經有迹可尋，早前佢喺朝早同其他功能組別候任議員一齊見傳媒，當時佢話自己有一個新稱號「1:89」，指懷着孤單心情進入議會。點知當日下晝佢自己再召開記者會時，就話雖然係唯一非建制派，但唔會感到太孤單，因為喺民生問題如福利及教育方面，仍有好大空間可以同建制派合作，強調喺共同社會利益上唔會有政黨門戶之分。一時一樣咁，究竟佢諗咩(口架)？
陳沛然怕捉鬼 兩邊群組退晒
其實，中間派或非建制派議員成日都會畀人問到會唔會靠邊，正如喺5年前，第6屆立法會啱啱開波時，無任何政治聯繫嘅醫學界議員陳沛然都曾經被邀請進入建制同埋泛民嘅WhatsApp群組，但佢亦退出咗兩個群組，之後都無同任何一邊埋堆，因為佢知道萬一兩個群組裏面有啲消息流出，一定會捉鬼，佢唔想被人懷疑，所以自己退出。有辦你睇，唔知狄志遠又會唔會面對類似嘅情況，佢又會有乜嘢抉擇呢？
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
